Doanejèl in de liêwekoil

Doanejèl 6, 2-29

Doarius, de Mèèdiër, was kuining gewërre toeng da' Bèlsassaar, de zuing van Nabucodonnosoar (Nebukadnessar), in Chaldèèënlaand vermoêrd weer. Doanejèl was duir diê ze voader ontvoord oit Judèèa èn benoemd tot sjèf van de moagiërs en woarzèggers van Babylounië. 'Em weer gevroagd oem t' ontsaifere, wa' dat 'en onzichtboare 'aand oep de plëster van de meur geschrèèven 'od, noada' ze wain 'odde gedroengke oit de bèèkers, gestoulen oit den tèmpel van Jeruzalèm.

menee – God 'èèt de doage van oe kuiningschap getèld èn der 'en èngden on gemokt;
tekeel – ge zè gewougen èn te loecht bevongde;
oefarsien/perees – oe kuiningkrak is verdiêld èn on de Mèèden èn de Parzen gegèève.’

Den oavend vuir dat 'em vermoêrd weer, 'od 'em nog loaten afkongdege dat Doanejèl as darde in rai zou regèère ouver 't kuiningkrak.

Doarius nam 'et besloit oem 'ongderdtwingteg satroape oan te stèllen ouver 'iêl 't raik. Dorbouve stèlden 'em drai raiksbesteurders oan, van wee Doanejèl der iêne was; on dee drai moeste de satroape rèèkeschap aflègge dat de kuining gin schoi zou laie. De kuinig docht er zèlefs on oem 'em oan te stèllen ouver iêl 't kuiningkrak.

Mor da' koste ze ni verkroppe en ze probeirden eet te vingde voer 'em oan te kloage. Ze koste gin rèède vingde of 'em betrappe oep 'ne misstap, want 'a 'od altëd z'n plicht gedon èn z'n aige noêt loate oemkoêpe.

Doroem goenge ze nor de kuinig mè' 'n dringend verzeuk.
Al de raiksbesteurders van 't kuiningkrak, stad'aawers en satroape, roads'iêre èn goevernuirs zèn van miêning, dat er e kuinigklak besloit moet oitgeveirdegd wërre, wor da'-d-in wërdt vastgelèè, da'-d-èèderiên di de koumende daarteg doage e verzeuk toet 'ne god of 'ne mèngs richt in de plëts van toet aa, maajestat, in de liêwekoil zal gegoeid wërre.

En de kuining stèlde da' zoe oep schrift, dat gin ènkel wèt van Mèèden of Parzen 'et zou kunnen 'erroope.

Gelak as Doanejèl 'oêrde van da' besloit, goeng 'em nor 'ois. In z'n bouvekoamer 'od 'em in de richting van Jeruzalem oupe vèngsters. Dor kneelde-n-'em nèèr, bad mè' z'ne god èn prèès 'em, persees gelak dat da' drai kiêre per dag z'n gewoênte was.

Toeng droenge de manne in z'n 'ois binnen èn vongden 'em gekneeld oep ze matteke.

Dan zèn ze nor de kuining gegon èn ze wèèzen 'em oep 'et kuiningklak besloit èn ze zèèë:

- "Doanejèl, iên van de Judèèse ballinge, sloagt gin acht oep aa, èn oek ni oep 't besloit da' gai oep schrift 'èt loate stèlle; drai kiêre per dag doot 'em ze gebèd."

De kuining kost ni droien of kiêre.

"Dèngkt eron, maajesat, da' gi verbod of besloit da' de kuinig 'èèt-d-oitgeveirdegd, veraanderd kan wërre.

'Iêroep gaf de kuining bevèl oem Doanejèl t' 'oalen èn 'em in de liêwekoil te goeie.

De kuining zèè:

- "Oewe God, diên on aawe kaant sto zal oe rèdde!"

Der weer 'ne stiên gebrocht èn dormèè dèkte ze 't gat van de koil too èn de kuining verzèègelde diê mè zaine zèègelringk èn mè' de zèègelringk van z'n macht'èbbers, oem te ver'ingdere da' eemaand eet zou veraanderen on den toostaand.

En de kuining goeng trug nor ze palais, mor 'a kost ni èète èn ni sloape.

Vreug in de morgend, as 't begon licht te wërre, stoeng 'm oep èn 'a leep hësteg nor de liêwekoil.

As 'em eroan kwam, reep 'em Doanejèl bedroofd too:

- "Doanejèl, deenor van de leivende God, 'eet-d-aawe God, diê zoe 'ard achter aa sto, oe van de liêwe kunne rèdde?"

En Doanejèl zèè tèège de kuining:

- "Maajestat, leift-vd-in iêweg'ad. Manne God 'èè z'nen èngel gesteurd èn de liêwemoile gesloute."

En Doanejèl weer oit de koil oem'oeg getrokken èn 'a 'od gi schrammeke.

Toeng gaf de kuining bevèl de manne te brènge di Doanejèl 'odde beschuldegd èn 'a leet ze soame mè' 'un kingderen èen 'un vraawen in de liêwekoil goeie. Ze woare nog ni good oep den boiëm van de koil gerokt of de liêwe veelen oan en vermërzelden al 'un knouke.

En 'et goeng Doanejèl good af, zolaangk da' Doarius èn Ceerus de Pars kuining woare.

Vollegend ver'oal: D'Arrek van Nouwèè